【狐说】狐言鸟语

狐说

扭纹柴
喺粤语里面形容一嗰人包顶颈、脾气古怪、好难搞、不近人情唔讲道理嘅人，通常会称之为“扭纹柴”嘅。


乜嘢系扭纹柴呢？大家知道以前一般人家里面都系烧柴嘅，劈柴，亦就系每家每户都要做嘅家务之一。柴嘅来源系树木，而树木因为各自品种同生长环境唔同，柴嘅纹理亦会有所唔同。有啲柴枝纹理会生得好直，一刀劈落去就可以顺利噉劈开两边，简直系“势如破竹”；而有啲柴枝纹理确实弯弯曲曲，一刀可以劈入去就已经唔容易，而且刀势被木纹所引导，往往就会歪曲用唔到力。咿嗰时候劈柴嘅人往往进退两难，继续劈，越劈越难劈；将刀拧出嚟嘅话，柴枝又将刀夹得好实，真系唔知点算好。


咿啲纹理扭曲嘅柴枝，就系“扭纹柴”喇，就好似嗰啲脾气古怪唔讲道理嘅人一样，无论你点样对佢都行唔通，实在系令人哭笑不得。由此引申，喺粤语里面对于嗰啲调皮捣蛋嘅小朋友，都会用“扭纹”嚟形容嘅。

狐说

犀利
喺粤语同普通话里面，都有“犀利”咿个词嘅，但系意思就完全唔一样，而且出处亦都完全唔同。粤语里面嘅“犀利”一般系用嚟形容厉害、了不起嘅意思。出处系源自于一个外国港笔品牌。


早期，世界上有三大著名钢笔品牌，分别系美国sheaffer(犀飞利)，法国lewis edson(威迪文)，同埋德国montblanc(万宝龙)。其中，犀飞利创办于1913年，喺1945年联合国宪章最后定案嘅时候，犀飞利就成为咗联合国指定嘅签字笔，各国代表都用“犀飞利”品牌嘅钢笔签名嘅。


1951年，美日和平条约喺三藩市签订，美国国务卿同日本首相都系用咿支犀飞利嚟签约嘅，同时，又好多届嘅美国总统都系用犀飞利嚟做专用笔。所以，喺四、五十年代嘅广东同香港，用得起咿只钢笔牌子嘅人士，自然就系非富则贵喇。若然有人见到朋友嗰袋里面插住咿个牌子嘅笔，都会赞佢犀飞利嘅，久而久之，“犀飞利”就成为咗“厉害”嘅代名词，时间一长，讲讲下就简化成“犀利”喇。

狐说

冇尾飞堶
喺粤语里面形容一个人神龙见首不见尾，经常搵唔到人，就会话佢“冇尾飞堶”，究竟乜嘢系“冇尾飞堶”呢？


“堶”其实就系“砖头”嘅意思。早喺宋朝时期，就已经有江湖卖艺嘅人表演飞堶，每年嘅寒食节仲有人表演飞堶戏。所谓飞堶嘅表演方式，其实就系以绳，绑住重物，上下挥动打圈，然后就向目标飞过去，再收翻嚟，有啲似电影里面嘅武器----流星锤。


但系，大家又想象下，如果咿嗰堶系冇尾嘅话，飞咗出去之后就收唔翻嚟喇，所以，后来大家就将成日都唔见踪影嘅人叫做“冇尾飞堶”喇。

狐说

频扑
粤语作为联合国教科文组织承认嘅世界第二大汉语语言，有好多独有嘅词语。咿啲词喺普通话里面系好难搵到直接对应嘅词嘅，准确嘅语境同埋语意，往往需要意会一下先得嘅。例如“频扑”，就系噉样嘅一个词喇。


粤语嘅“频扑”，系指匆忙、劳碌奔忙嘅意思。所谓“频”，既有“匆忙”嘅意思，亦有“重复”嘅意思，而“扑”字，则系跑嚟跑去之意。一个人匆匆忙忙反反复复噉跑嚟跑去，自然疲劳困顿，辛苦劳累喇。


所以粤语里面讲啲打工仔辛苦，往往就会讲打工仔“为两餐频频扑扑”，一语道尽“揾食艰难”嘅意味。相信各位打工嘅朋友都会体会得到。


当然，现时好多朋友虽然打工辛苦，但都系坐喺写字楼里面动脑，唔需要喺马路上面跑嚟跑去，咿嗰时候就唔适宜用“频扑”来形容自己啦。至于该用边个词？我哋择日再讲。

狐说

食碗面反碗底
喺粤语里面“食碗面反碗底”哩句话嘅字面意思系将碗里面嘅嘢食完之后，就将嗰碗反扣放低，碗底向上碗口向下。噉点解哩嗰做法会被人认为系忘恩负义呢？


原嚟，我哋正常人食饭嘅时候，自然系碗口向上嘅。而碗口向下，则系拜祭仙人嘅做法。喺祭祖嘅时候要先将嗰碗倒置，再将碗攞起，将碗里面嘅饭倒出嚟，哩种做法系好多地方嘅习俗。


而“食碗面反碗底”嘅做法就等于系将人哋畀嘅饭食完之后，唔单只唔感激人哋嘅赠饭之恩，反而希望人哋死，或者系将人哋当成死人。噉嘅做法唔系忘恩负义又系乜嘢呢？所以，我哋讲“食碗面反碗底”嘅时候，通常后面都会跟一句“正一反骨仔”嘅。

狐说

棚尾拉箱
“棚尾拉箱”咿嗰词估计已经好少后生仔会讲，会用嘅人就更加少之又少喇，大概系因为哩嗰词诞生嘅场景已经比较少见嘅关系吧。


所谓“棚尾拉箱”，系形容一个人走得好匆忙、好狼狈嘅意思。同“冇鞋挽屐（kek6）走”嘅意思相近。


哩嗰词嘅出处系嚟自以前乡间嘅戏班。旧时逢年过节，乡下都会请戏班下乡演戏，但受到经济能力嘅限制，往往唔一定可以请到好好嘅戏班。而一啲二三流嘅戏班一旦表演欠佳，好自然就会被台下嘅观众喝倒彩嘅，当形势难以维持嘅时候，戏班就唯有喺棚尾（即：后台）匆匆忙忙噉执嘢走人喇。


后嚟大家就将遇到无法收拾嘅场面，要匆匆忙忙走人嘅情况称之为“棚尾拉箱”喇。又或者系当骗子诈骗得手走人之后，受害者仍然懵然不知，都可以用“棚尾拉箱”嚟形容嘅。

狐说

诈帝
讲粤语嘅人都应该知道，“诈帝”即系“假装”或“造假”嘅意思。


咿嗰词嘅出处就要追溯到秦朝末年，当时楚汉争霸，项羽带兵围攻刘邦所在嘅荥阳，打到汉军气都咳埋，眼睇嗰城池就快守唔住喇，刘邦都心知再噉落去唔系办法。此时，刘邦麾下有一位谋士叫陈平，陈平出咗一个主意，叫大将纪信穿上刘邦汉王嘅服饰，坐住刘邦嘅车驾，带住大批侍宠、侍女喺东门突围。项羽嘅楚军见到”刘邦“出嚟突围，于是就集中兵力去围佢喇。再加上佢身边有一大批侍女，平时士兵出嚟打仗就好少见女人嘛，于是就更加被吸引去东门嗰边喇。


趁住咿嗰机会，刘邦就换上普通百姓嘅服装，从西门偷偷哋走咗去，逃出生天。纪信就阴功囖，被项羽捉住，杀咗。后来，刘邦做咗皇帝，而先前纪信冒充过刘邦出城，即”诈做皇帝“喇，于是，后人就用”诈帝“咿嗰词嚟表示”造假、冒充”嘅意思喇。

狐说

藤条焖猪肉
我哋细个嘅时候，若然系做咗调皮捣蛋嘅事，又或者喺学校被老师投诉，噉阿爸或者阿妈就好有可能会请你食一道广东名菜“藤条焖猪肉”喇。


何谓“藤条焖猪肉”呢？讲白就系阿爸阿妈攞藤条嚟打你个屁股啦。以前广东人每家每户都会有好多用藤做嘅家居用品嘅，鸡毛扫就系其中之一喇。通常阿爸阿妈打仔女呢，都会将鸡毛扫调转嚟揸，用长长嘅藤条嚟打啲仔女。因为藤条嘅柔韧性好，打起嚟会好痛嘅，但系又唔会好似戒尺之类嘅物体噉硬，唔容易打出严重嘅伤患，所以藤条系家长执行家法最常用嘅“武器”。


而“焖”字亦都有讲究㖞。广东人喜欢吃嘢，对厨艺方面亦都颇有研究，所谓“焖”，就系将食材放喺煲里面，𢫏实个煲盖，然后就用文火嚟慢慢煮烂。而“藤条焖猪肉”之所以用个“焖”字，其实就系意味啲仔女翻到屋企，无处可逃，唯有任由家长慢慢炮制嘅意思。而“猪肉”就喺仔女个屁股喇。


不过，现时好多家庭都已经好现代化喇，体罚仔女嘅情况就越嚟越少，而好多家庭亦都好少会有鸡毛扫咿样嘢，所以，食到正宗“藤条焖猪肉”咿道广东“名菜”嘅机会就越嚟越少。

狐说

烚熟狗头
喺粤语里面，形容一个人笑得好假，皮笑肉不笑，一副阿谀奉承嘅样，就会话佢笑得“烚熟狗头”一样。


点解笑得假会被称为“烚熟狗头”呢？冇吃过狗肉嘅朋友就可能唔知道。原来，将狗头放入大镬里面烚，因为加热嘅关系，烚熟之后狗嘅嘴巴就会裂开，就好似笑脸一样。但实际上大家都知道佢（狗）肯定唔系真正想笑嘅，都被人吃喇，仲笑得落咩？所以，粤语就用“烚熟狗头”嚟形容假笑喇。

狐说

死鸡撑饭盖
“死鸡撑饭盖”哩句话喺粤语里面系用嚟形容嗰啲明明系自己做错咗，但系就死都唔肯认错，仲编造好多理由畀自己去辩护嘅人。例如喺超市里面排队埋单，突然间有人插队，被人发现咗之后，插队嗰条友仲死口唔承认自己插队，噉你就可以话佢“死鸡撑饭盖”啦。


“死鸡撑饭盖”哩句话究竟喺点样嚟嘅呢？死鸡又点解会撑饭盖呢？大家如果蒸过鸡，应该都知道，将光鸡放入饭煲里面蒸，蒸熟咗之后，鸡脚肯定会蹬直嘅，如果只鸡比较大，就好有可能会连煲盖都撑开。点解会噉样呢？原来，刚削洗干净嘅鸡，鸡脚关节都仲系柔软灵活嘅，可以弯曲住塞入煲里面。而喺放入煲里面蒸热之后，鸡脚嘅筋就会收缩使鸡脚撑直，甚至将煲盖都撑开。


明明死咗，都仲要硬撑，哩个状况用嚟形容嗰啲打死都唔肯认错嘅人，实在系形象生动到极点喇！